السائق السبّاب



بتكون ماشي وعم تزمر للي قدامك ليزيح من طريقك، وعم تنشر اللي وراك إنو عم بزمرلك، وكل ما طلع واحد من مفرق بتستحضر قاموس

الشتائم اللي إلك بصمات واضحة بتأليفو، لا وبتصير تبتكر مسبات جديدة ما حدا سبقك عليها، لدرجة إنك بتنسى شو سبيت من شوي لأنك

ما سجلت هالمسبة بدفترك المتلان شتائم للمارة عالطريق وللي صافين سيارتهم وللإشارة اللي طولت وهيي حمرا، وأحيانا للشرطي اللي

واقف بطقة الشمس، ومسباتك البشعة إللي مستمرة طول ما دولاب سيارتك ماشي وطول ما إنت ورا هالدركسيون اللي عرق بين إيديك قد

ما عم تشد عليه، عا اساس بتسب وبتكز عاسنانك وبتشد بهالدركسيون، وممكن تسب لبسينة مرقت قدامك، وممكن تسب لليابان لانها

هي اللي صنعت السيارة اللي إنت راكبها عاساس إنو اليابان صنعت كمان السيارات التانية اللي عم بضايقوك طول ما إنت ماشي، إنو

أنا بدي إسألك: الحنجرة بشكل عام بتتعب من كترة الحكي فكيف الحكي بصوت عالي مع مسبات، إنو إنت إذا حدا سبلك مسبة زغيرة

بتنزل من السيارة وعيونك عم تقدح شرر وخدودك منفوخين من الغضب فكيف هالناس اللي عم تاكل منك مسبات عالطالع والنازل، بدي

هالمرة اسألك شي تاني: إذا طلعلك واحد متل ما بقولو متلك بكز عاسنانو وخدودو بتنتفخ بسرعة أكتر، ونسبة الشرر بعيونو بيقدح

أكتر وأكتر، وفوق الدكة إيدو طايلة ومدعوم، شو بتعمل يا حلو، إنو بتسبللو أكتر، خبرني، بتشرقط عليه أكتر، هيدا أصلا ما حايخلي

بتمك اسنان لتقدر تحكي بأحرف سليمة، وممكن ما يخليلك لسان لتحكي فيه، إذا طلع من اللي بيسحبوا فردهم وبقوصوا دغري، ساعتها

أكيد وحتى لو ما قوص وحتى لو اكتفى بشي بوكس هرلك سنانك فيه وركب سيارتو وفل برواق وقلك هيك بكل برودة:

(لتتعلم تسب مرة تانية).


إذا صادفك حدا هيك شي نهار خبرني، مش لح تندم على كل مسبة سبيتها؟ ساعتها مش حاتسأل حالك وبجدية تامة وإنت عم تلملم

سنانك وبكل ندم، أنا بالأخلاق لوين رايح؟

الهارب من دفع الزكاة



على سهراتك وضهراتك بتدفع كاش وأحيانا شيكات، إنو شو فارقة معك، معك، ومعك كتير، ما المحلات عم يشتغلوا والبيع ماشي ما

شاء الله وكلو تمام، هلق رحلاتك عفرنسا وإيطاليا وتركيا، وهون وهون للاستجمام أكيد مش دافعة الجمعيات الخيرية تكاليفها، ولا حدا

متبرعلك فيها، لا هيدي الرحلات واللي مكلفة ءالاف ومئات الدولارات دافعها عمدا وعن سابق تصميم من جيبتك الواسعة اللي عم تهر

مصاري كيف ما برمت، إنو ليه بحبك كرسونية المطاعم اللي بتروح عليها، لأنك طويل مثلا، أكيد لأ، هول لما يركضوا ليظبطولك أحلى

طاولة لأنو لما تفل بتناولهم يومية كاملة بخشيش ودايما من نفس الجيبة الواسعة، طيب بدلاتك الفخمة والسينييه، ركزلي عالسينييه، واللي

دايما ما بتظبط إلا بصبابيط ملمعة ومن نفس فصيلة السينييه واللي طبعا سعرها لحالها شغلة، إنو كل هول منين مثلا، إنو ءاخدهم دعاية

مثلا عا أساس إنت روبرتو كارلوس أو رونالدينيو، لأ هول من نفس الجيبة ومن نفس رقم الحساب، هول من نفس إيراد المحلات وأرباحك

الكتيرة ومصرياتك اللي عم تحرك بالسوق، إنو خطين تلفون وساعة لكل لون تياب، وسياراتك اللي منوعين ما بين واحدة للضهرة

وواحدة للصيد وواحدة للشغل بتحمل دعك، هول كللهم مش جايين من تعاونية السيارات الحديثة للتبرع والتكافل، هول لوحدن ثروة إذا

بينجمع تمنهم وممكن إذا بعتهم تفتح محل زيادة تضيفوا على سلسلة فروعك المنتشرة والواسعة والكبيرة واللي كلها بفضل الله ورزق من

الله، من ربّ العالمين اللي أمرك إنك تدفع زكاة أموالك، يعني تخرج قدر معين من المال واجب عليك على هالمصريات على هالبضاعة

والتجارة المختلفة، ربّ العالمين اللي أعطاك بغير حساب ومكّنك من إنو تشتري وتروح وتجي، كل هالنعم والكرم من الله ما خلاك إنك

تمتثل لأوامره وتدفع اللي عليك من زكاة، وبتصير تشوف طرق كيف تهرب وتتهرب من دفعها أو أحيانا بكل وقاحة هيك ما بتدفعها،

مفكر إنو وفرت عاجيبتك، وإنو عم تصمد زيادة، ليك، اللي عم تصمدو هو ذنوب ومعاصي بسبب تركك لهذه الفريضة ما بتعرف شو بقول

رب العالمين بالقرءان ، {وَأَقِيمُوا الصَّلَاةَ وَآَتُوا الزَّكَاةَ وَمَا تُقَدِّمُوا لِأَنْفُسِكُمْ مِنْ خَيْرٍ تَجِدُوهُ عِنْدَ اللهِ} وما سامع النبيّ لما يقول عن

الزكاة: "والذي نفسي بيده لا يموت رجل فيدع إبلا أو بقرا لم يؤدي زكاتها إلا جاءته يوم القيامة أعظم ما كانت وأسمنه تطؤه بأخفافها

وتنطحه بقرونها كلما نفدت أخراها عادت عليه أولاها حتى يقضى بين الناس" رواه الترمذي. ليك يا إستاذ في حالة واحدة ما بيتوجب

عليك فيها الزكاة، لما ما يكون عندك مال تدفع عنو الزكاة وتكون من اللي بيندفعلن، لما توصل لهالمستوى وتفيق ما تلاقي بجيبتك

ليرة وما عندك كل هالسيارات وهالمحلات والتياب والساعات والصبابيط، ولما تصير تتمنى إنو يجي مين يدفعلك الزكاة، ساعتها عن جد

لح تقول أنا شو عملت، ولوين رايح.